У мінулую пятніцу у межах сумеснай акцыі Міністэрства культуры Рэспублікі Беларусь і пасольства Кітайскай Народнай Рэспублікі ў Рэспубліцы Беларусь, ініцыяванай міністрам культуры нашай краіны Барысам Святловым і падтрыманай пасольствам дружалюбнай нам дзяржавы, у аг.Жылічы наведаліся Надзвычайны і Паўнамоцны пасол Кітайскай Народнай Рэспублікі ў Рэспубліцы Беларусь Цуй Цымін, яго саветнік па культуры Чжан Хунвэй і сакратар Хэ Цывей, міністр культуры Рэспублікі Беларусь Барыс Святлоў, намеснік старшыні Магілёўскага аблвыканкама Валерый Малашка, сакратар Бабруйскага епархіальнага ўпраўлення пратаіерэй Сергій Каровінскі. Суправаджаў ганаровых гасцей старшыня райвыканкама Аляксандр Бутараў.

Спачатку госці прайшліся па памяшканнях Жыліцкага палацава-паркавага ансамбля, які з’яўляецца помнікам архітэктуры ХVІІІ-ХІХ стагоддзяў, дзе працягваюцца работы па рэстаўрацыі, з цікавасцю слухалі расказ дырэктара гістарычнага комплексу-музею Ларысы Забелавай аб узнікненні ў 30-я г. ХІХ ст. палаца і яго насельніках. Удзельнікі сустрэчы змаглі акунуцца ў старажытныя часіны, а таксама ацаніць маштабнасць сённяшніх работ па аднаўленні культурнай спадчыны.
Затым прысутныя ўважліва разглядалі экспазіцыі, размешчаныя ў адрэстаўрыраваных памяшканнях палаца. Гасцей вельмі зацікавілі многія экспанаты далёкай мінуўшчыны, яны задавалі пытанні наконт таго ці іншага прадмета. Дарэчы, Цуй Цымін нядрэнна размаўляе на рускай мове, а тое, што яму падабаецца наша краіна, беларускі народ, ад душы выказаў на беларускай мове.

Ганаровыя госці здзівіліся, калі ўбачылі на стэндзе мноства фотакартак маладажонаў, зробленыя ў бягучым годзе. Гэта сведчыць аб тым, што палацава-паркавы ансамбль карыстаецца попытам у маладых пар, якія ўпэўнены, што, пабываўшы тут у дзень заключэння шлюбу, іх сямейны саюз у далейшым будзе такім жа моцным, як і сцены панскага маёнтка, якія не паддаюцца ніякім выпрабаванням.
Шчыра віталі гасцей у мясцовай дзіцячай школе мастацтваў. Яе дырэктар Вольга Сімановіч зрабіла аглядную экскурсію па ўстанове адукацыі, якая размясцілася ў палацы пасля ўвядзення ў эксплуатацыю першай чаргі рэстаўрацыі. Удзельнікі сустрэчы пабывалі ў класе мастацкага аддзялення, дзе ішлі заняткі, і рабяты займа-ліся любімай справай.
Для далейшага развіцця творчых здольнасцей юных жылічан Надзвычайны і Паўнамоцны пасол Кітайскай Народнай рэспублікі перадаў дырэктару навучальнай установы сертыфікат на 20 мальбертаў.
Цуй Цымін падкрэсліў, што сустрэча праходзіць у межах развіцця сяброўскіх сувязей паміж дзвюма дзяржавамі, падзяліўся станоўчымі эмоцыямі ад убачанага. Ён адзначыў, што вельмі задаволены тым, як беларусы беражліва ставяцца да захавання старадаўняй культурнай спадчыны.
Ганаровы госць з задавальненнем адзначыў той факт, што адрэстаўрыраваныя памяшканні, якія з’яўляюцца сведкамі многіх важных гістарычных падзей, аддадзены для развіцця творчых здольнасцей хлопчыкаў і дзяўчынак. Гэта сведчыць аб тым, што ў Беларусі значная ўвага надаецца дзецям — будучыні краіны, падкрэсліў Цуй Цымін.
Затым для ўдзельнікаў сустрэчы быў дадзены канцэрт. Прысутныя шчыра апладзіравалі Тэоне Бебурыя, Мацвею Пашкоўскаму, Валерыі Філіпец, Уладзіславу Нявінскаму, Ангеліне Рэва, Ганне Мурашка. А калі Міхаіл Забелаў і Раман Каплуноў на баянах зайгралі “Кацюшу”, усе без выключэння падпявалі.
На памяць аб наведванні Жыліцкага палацава-паркавага ансамбля рабяты ўручылі ганаровым гасцям сувеніры, выкананыя ўласнымі рукамі.

Таццяна БАРАДЗІНА.
Фота
Максіма МІКЕШЫНА.

kirovsk.by